《有奶便是娘》
「喂！我出一出去先！」同事A 於工作時間，突然拋低所有工作，飛奔離開辦公室。
老闆及同事竟然完全無責怪佢嘅意圖，反而表示同情。大明係明白嘅！同事A 家中有女兩個月，但香港優質奶粉不足，一收到風附近有「奶」，就立即要去搶購。
自從水貨客大舉入侵香港之後，香港人嘅生活似乎無聲無息咁改變咗。作為一個無子女嘅單身人士，可能只會覺得搭港鐵前，要修煉下金鐘罩，以防比一車又一車「推車仔」撞親。但係當見到身邊朋友為搶奶粉而奔波時，我真係忍唔住要歎氣。
香港人連必須品都保唔住！
有唔少支持市場經濟嘅人，認為呢種社會現象係無問題。甚至有所謂名咀，竟然以香港人到外國買i-phone 作為比喻，支持無需管制。首先，果班支持以「市場」供求去自動解決問題嘅人，肯定係讀者讀上腦。因為以「需求」解決嘅先決條件下係人人都要自私，而且解決嘅係「經濟問題」，而唔係「社會問題」。如果單以「需求」去解決的話，似乎有嬰兒因無奶食而餓死都係正常現象！
買i-phone 當然係可以「需求」去解決，因為無i-phone 係唔會死人嘅！不過，如果一個嬰兒無奶食，係唔係可以搵到其他代替品呢？如果遲下國內人大舉掃感冒藥，佢地夠財力直接向藥廠買晒所有藥。咁又係唔係可以唔理？當某種行為已經開始危害本地人利益，甚至健康時，我認為唔可以任由市場調節。
唔知我地政府官員用咩思維？竟然有人計劃以「本地媽咪會」去配售奶粉比本港父母，但對水貨客集團式掃貨就「隻眼開，隻眼閉」。政府官員果然毫無創意可言，只識抄襲上世紀大日本皇軍响二戰時統治外地嘅方式。不過，諗深一層又難怪，對地方官而言，到底本地人定國內人先係「老闆」，真係一睇就明。
當年日本皇軍於本港作奸犯科，當然唔會受制裁；今日水貨蝗軍响香港走私，同樣暢通無阻。
當一個政府唔係由人民受權嘅時候，佢自然唔會用心真正「做實事」。當大部份市民仲嘈緊起樓置業問題仲未解決時，「衣、食、住、行」中排响「住」之前嘅「食」已經受到威脅。原因只係因為國內連奶粉都信唔過。
人地話「生娘不及養娘大」，自然係因為養娘都有比過奶水去養大個仔。而家呢個生娘連奶都無滴，仲要同叫十幾個兄弟嚟爭食，你叫我地點認妳呀！你老母！
Search